ប៊ុនថេត: ប្រទេសទាំង៥ ដែលនាំចេញផលិតផលច្រើនបំផុតលើលោក

១ ប្រទេសចិន
ក្នុងនាមជាមហាយក្សសេដ្ឋកិច្ចទី ២នៅលើពិភពលោកបន្ទាប់ពីអាមេរិក ប្រទេសចិនក៏ត្រូវបានគេចាត់ទុកថា ជាប្រទេសធំបំផុតនៅលើពិភពលោកដែលបាននាំចេញផលិតផលច្រើនជាងគេនៅ ពេលបច្ចុប្បន្ននេះ។ មហាអំណាចឧស្សាហកម្មមួយនេះ បាននាំចេញផលិតផលសំខាន់ៗរួមមាន គ្រឿងអេឡិចត្រូនិក សំលៀកបំពាក់ វាយនភណ្ឌ ដែកថែប និងឧបករណ៍បម្រើក្នុងវិស័យសុខាភិបាលទៅកាន់ប្រទេសដៃគូជាច្រើន ដែលគិតជាទឹកប្រាក់មានប្រមាណជា ១,៩០៤ ពាន់ពាន់លានដុល្លារក្នុងមួយឆ្នាំ។

២ ប្រទេសអាល្លឺម៉ង់

ថ្វីត្បិតតែអាល្លឺម៉ង់ជាប់ចំណាត់ថ្នាក់សេដ្ឋកិច្ចលេខ ៤នៅលើពិភពលោក ក៏ប៉ុន្តែប្រទេសដែលមានសេដ្ឋកិច្ចធំបំផុតនៅទ្វីបអឺរ៉ុបមួយនេះ បានទទួលចំណាត់ថ្នាក់លេខ ២ ខាងនាំចេញផលិតផលនៅពេលបច្ចុប្បន្ននេះ។ អាល្លឺម៉ង់ បាននាំចេញផលិតផលសំខាន់ៗរួមមាន រថយន្ត គ្រឿងម៉ាស៊ីន ផលិតផលគីមី កុំព្យូទ័រនិងអេឡិចត្រូនិក វាយនភណ្ឌ អាហារ និងផលិតផលផ្សេងៗជាច្រើនទៀតទៅកាន់ប្រទេសជាដៃគូក្នុងទឹកប្រាក់ ប្រមាណជា ១,៥៤៧ ពាន់ពាន់លានដុល្លារក្នុងមួយឆ្នាំ។

៣ សហរដ្ឋអាមេរិក

អ្នកណាក៏ដឹងដែរថា សហរដ្ឋអាមេរិកជាមហាអំណាចសេដ្ឋកិច្ចលេខ ១នៅលើពិភពលោក ក៏ប៉ុន្តែខាងនាំចេញ ប្រទេសនេះបានទទួលចំណាត់ថ្នាក់ត្រឹមលេខ ៣ប៉ុណ្ណោះ។ ដោយត្រូវបានគេចាត់ទុកថា ជាប្រទេសដែលសម្បូរទៅដោយវត្ថុធាតុដើម និងមានប្រព័ន្ធហេដ្ឋារចនាសម្ព័ន្ធល្អៗ មហាយក្សមួយនេះ បាននាំចេញផលិតផលសំខាន់ៗដែលក្នុងនោះរួមមាន គ្រឿងម៉ាស៊ីន សម្ភារៈផ្គត់ផ្គង់ក្នុងវិស័យឧស្សាហកម្ម ប្រេង យន្តហោះ រួមទាំងឧបករណ៍បច្ចេកវិទ្យាទំនើបៗដទៃទៀត ទៅកាន់បណ្ដាប្រទេសជាដៃគូក្នុងរង្វង់ទឹកប្រាក់ប្រមាណ ១,៤៩៧ ពាន់ពាន់លានដុល្លារក្នុងមួយឆ្នាំ។

៤ ប្រទេសជប៉ុន

ជប៉ុនបានជាប់ចំណាត់ថ្នាក់សេដ្ឋកិច្ចលេខ ៣នៅលើពិភពលោកបន្ទាប់ពីចិន ខណៈដែលការនាំចេញរបស់ជប៉ុនទទួលបានចំណាត់ថ្នាក់លេខ ៤ នៅពេលបច្ចុប្បន្ននេះ។ មហាអំណាចនៅតំបន់អាស៊ីប៉ាស៊ីហ្វិចមួយនេះ បាននាំចេញផលិតផលសំខាន់ៗមាន រថយន្ត គ្រឿងម៉ាស៊ីន ដែកថែប គ្រឿងបន្លាស់ សម្ភារៈប្លាស្ទិក ផលិតផលពាក់កណ្ដាលសម្រេច និងផលិតផលផ្សេងៗទៀតទៅកាន់ប្រទេសជាដៃគូក្នុងទឹកប្រាក់ ៧៨៧ពាន់លានដុល្លារក្នុងមួយឆ្នាំ។

៥ ប្រទេសបារាំង

បារាំងបានក្លាយជាប្រទេសទី៥ នាពេលបច្ចុប្បន្ននេះ។ ទន្ទឹមនឹងមានកេរ្តិ៍ឈ្មោះជាប្រទេសដែលមានសេដ្ឋកិច្ចអភិវឌ្ឍជឿនលឿន មួយ បារាំងបាននាំចេញផលិតផលសំខាន់ៗរួមមាន ផលិតផលកសិកម្ម គ្រឿងម៉ាស៊ីន ដឹកជញ្ជួន យន្តហោះ ដែកថែប ផលិតផលគីមី ភេសជ្ជ គ្រឿងអេឡិចត្រូនិក និង ផលិតផលផ្សេងៗទៀតទៅកាន់ប្រទេសជាដៃគូ គិតជាទឹកប្រាក់ប្រមាណជា ៥៨៩,៧ពាន់លានដុល្លារក្នុងមួយឆ្នាំ៕